尋尋覓覓

對我黎講, 結婚當日最重要既一刻, 應該係雙方宣誓後交換戒指, 正式成為夫妻的時刻。

雖然過去到收過陳生幾隻愛的指環, 但戒指呢一環仍然係萬分重要, 因為要帶一生嫁嘛~

話就話黎呢日仲有年半有多, 但呢排不論同陳生行街, 或者同朋友買野, 都會留意下有無合心意既款~

但要求高既陳生o係度, 又邊會咁容易揀得到...........我諗我地一定唔會o係周氏系列度買到我地既the one~因為d款實在係太大路啦~陳生想要既....係一對簡單得黎, 又有少少特別, 少少款既對戒.......其實我都係既~因為太花巧唔似係結婚戒指, 莊重既婚禮上當然要配上一對似結婚戒指既戒指啦 (好似用緊肺講野  )

唔搵唔知.......原來HK 有好多出名但好少宣傳既舖頭, d款仲好得添~不過價錢又相對地..............

不過唔緊要~~大把時間, 慢慢睇, 慢慢揀~再唔係.....自己設計叫爹爹幫我地整對都得~

但都可以分享下我最近幾心儀既款

PN出品真係唔錯, 佢d款特別d, 唔似周氏系列o個d傳統款式~

呢對有日行街見到已經超鐘意~~~
不過老實講我知陳生應該唔多like 男款, 因為女仔左少少~
因為咁, 我特登問個sales 有無d類似既簡單款可以配到呢隻女款
sales 姐姐就介紹左我呢款....

其實都唔差呀~~配上去都好襯~~

咁就事不延遲, 之後當然帶左陳生去睇下啦~~~
果真係呢d comment, 不過令我surprise 係.....陳生話如果比佢揀, 佢竟然會揀返上面隻男款~~真係估唔到.......

2隻都帶過上手, 雖然上面o個個款靚d (係真係好靚!!!!) 但覺得下面個款帶上去好似順眼d........好多真係要試過先知~

就係咁, 我地既婚戒之旅暫時要告一段落~
要繼續搵下我地既一生信物啦~~努力!!!!