向日葵: ♫ ♪ 終於落訂啦!!!! ♪ ♫

講到之前同陳生睇過都幾滿意, 事不延遲, 當然同媽媽去下啦~

爹爹呢2日又返大陸, 唯有只係問下佢意見, 點知佢一聽到聯邦, 就已經即刻話”咁就差唔多啦~” (好膚淺囉!!!!)

趁第2日返夜, 同媽媽去飲下茶, 估唔到平日中午都咁多人, 我地個八角廳已經坐滿, 咁唯有坐另一個廳, 老實講, 野食同服務都唔差, 唯一係個糯米卷真係好麻麻…不過唔緊要~擺酒唔食糯米卷既 haha

媽媽意見??嗯…佢只係話”會唔會睇下其他地方呀??” , 其實我已經覺得好累啦~所以都直接同佢講, 佢都話如果係你鐘意啦~呢度其實都OK既……雖然好似”焗”佢講咁, 不過我估佢真係覺得唔好會開聲既, 所以都由佢啦~~~~

打鐵趁熱~今日就約埋佢媽媽同家姐~等家姐同經理傾埋OK就落訂~

飲飽食醉之後, 就請人搵陳經理過黎, 陳經理我只係O係電話同佢聯絡過, 今日都係第一次見佢, 睇落佢都幾nice同幾穩重~

有陳生家姐O係度, 當然佢做主導啦~我地D做細聽下內容就得~haha

家姐真係好勁呀!!!問晒要問既野不特止, 仲問左個陳生都諗唔到既問題 “你地個租約去到幾時”~一問, 陳生見阿經理既眼神唔同左, 好似覺得家姐係一個做足功課既人咁~不過陳經理好肯定會我地講岩岩續左約, 叫我地唔駛擔心

傾到咁上下, 陳經理就帶我地行左一圈~so far大家都覺得OK~再坐底落訂~

除左一D佢自己本身包/送既之外, 基本上佢都無額外加比我地~(一開始上網睇comment 我已經無乜抱期望, 因為個個都話聯邦企得好硬 )

但估唔到真係乜都無O者~不過家姐一見張協議書, 就已經唔再bargain D咩, 因為佢張野既內容全部都白紙黑字寫晒出黎, 唔似人地酒樓咁一張blank form, 雙方傾好咩就寫落去, 所以根本都無bargain既餘地….陳經理都自知先明, 都話佢公司可傾既彈性好少, 不過就勝在大酒樓, 穩穩陣陣, 無咩風險~所以都決定落訂啦~